Blender 佇 2.81 版新加一个 White Noise 紋理節點。這个節點的用途，我閣無啥清楚。初步瞭解的是，伊會根據輸入的數值隨機產生佇 0~1 之間的數字。頂面的圖是用 Blender 2.9.0 畫的，內面的 White Noise 紋理節點根據 Texture Coordinate 節點輸出的座標值產生無仝的色。White Noise 紋理節點的頭前是 Vector Math 節點，內底有加一个 Snap 運算功能；這个功能會使共實數改換做以 Increment 欄位內的數字為進位值的數目。所以咱看到的結果就是一塊塊、無仝色的正方形。